top of page

Kya aap bacche ke liye koshish kar rahe hain? Bedroom ke baahar aur andar apne chances ko kaise badh


Ye faisla karna ki ab aap ek family shuru karne ke liye taiyaar hain, ek zaroori aur exciting kadam hai! Nivi aapke is safar mein aapka saath dene ke liye maujood hai aur pregnant hone ke chances ko badhaana, acche lifestyle choices karna, bedroom tips aur fertility ke baare mein galatfahmi jaise kai issues par ham aapki madad karne ke liye taiyaar hain. Zyada jaan ne ke liye aage padhen!


Fertility ko boost karne ke liye lifestyle tips

Healthy pregnancy ki shuruaat healthy lifestyle se hoti hai. Chahe aap pregnant hone ki koshish kar rahi hain ya nahin, sehatmand rahne ke liye aap ye cheezen kar sakti hain:


Apne vazan ko healthy rakhen

Pregnancy ke dauraan aapki body mein kai badlaav honge. Isliye, baccha hone ki koshish karne se pahle zaroori hai ki aap apne khyaal rakhen! Agar aapka vazan healthy rahega, to aap jaldi pregnant ho sakengi aur saath hi pregnancy ke dauraan problems bhi kam rahengi. Accha khaana aur regular physical activity aapko healthy vazan banaaye rakhne mein madad karegi. Jaise khoob phal, sabziyaan aur whole grains khaana, aur rozaana walk karna aapko healthy rahne mein madad karega. Bahut zyada exercise nahin karen kyonki hafte mein 5 ghante se zyada high intensity exercise karne se fertility kam ho sakti hai.


Smoke nahin karen, zyada alcohol nahin len, aur drugs istemaal nahin karen

Smoking, alcohol, aur drugs aapki fertility ko kam kar sakte hain aur aur aapke bacche ke liye serious problems ho sakte hain, jaise miscarriage ya ectopic pregnancy. Smokers ka estrogen level aamtaur par kam rahta hai, jiski vajah se unki menstrual cycle par asar padta hai aur pregnant hone ke chances kam ho jaate hain. Ye aapke partner par bhi laguu hota hai: smoking, zyada alcohol aur drugs ke istemaal se males mein sperm count aur quality kam ho jaati hai. Yaad rakhen, agar aap pregnant ho jaati hain, to aapko alcohol bilkul bhi nahin peeni chahiye.


Sexually transmitted infections (STI) se khud ko safe rakhen

Kuch infections ki vajah se females mein infertility ho sakti hai, jaise chlamydia aur gonorrhea. Isliye, zaroori hai ki jab aap pregnant hone ki koshish nahin kar rahi hain, to aap condoms jaise barrier methods ka istemaal karen.


Har roz folic acid len

Folic acid (vitamin B) lene se aapka ovulation badhta hai aur fertilization ko boost milti hai. Pregnant hone par, ye aapke bacche ko bhi sehatmand rakhta hai. Folic acid pre-natal vitamins mein maujood hota hai, jo aap apne local health clinic se le sakti hain. Acchi khabar ye hai ki kuch khaane bhi hain jo folate se bharpur hote hain, to inhen apni diet mein zaroori shaamil karen!

Ye rahe kuch khaane jin mein folate hota hai:

  • Hare patton vaali sabziyan (shaljam ke patte, palak, romaine lettuce, asparagus, brussels sprouts, broccoli)

  • Beans, moongphali, aur surajmukhi ke beej

  • Taaze phal aur phal ka ras

  • Whole grains

  • Liver

  • Seafood

  • Ande

Apna stress kam karen

Agar aapko pregnant hone mein dikkat aa rahi hai, to aapko frustration mahsoos ho sakta hai. Lekin yaad rakhen, apni body ke saath apni mental health ka khyaal rakhna bhi behad zaroori hota hai. Agar aap apni breathing par kuch minute focus karen, to ye bhi aapko calm rahne mein madad kar sakta hai. Yoga aur meditation jaisi activities bhi aapka stress kam kar sakti hain.


Fertility boost karne ke bedroom tips

Agar aap pregnant hone ki koshish kar rahi hain, to birth control methods ka istemaal band kar den! Aap kitni jaldi fertile hongi, ye aapke istemaal kiye gaye birth control method par depend karta hai. Jaise, agar aap hormonal birth control (jaise pill) ka istemaal band karengi, to aapki natural menstrual cycle ko normal hone mein ek mahine ka time lag sakta hai. Agar aap barrier method (jaise condom) istemaal kar rahi hain, to aap iska istemaal band karte hi pregnant ho sakti hain.


Regular sex karne par aapke pregnant hone ke chances zyada honge, lekin sex ka time bhi zaroori hai. Aapki cycle par depend karte huye, mahine ke kuch din hote hain, jab aapke pregnant hone ke chances zyada hote hain. Jaise, period khatm hone ke 2 se 3 din baad sex karne se aapke pregnant hone ke chances badh jaate hain. Apne fertile (aur infertile) dinon ko track karne ke liye aap Calendar Method ka bhi istemaal kar sakti hain. Agar Day 1 aapke period ka pahla din hai, to Calendar Method ke mutabiq, aap sabse zyada fertile Days 8-19 ke dauraan hongi. Agar aap in dinon sex karengi, to aapke pregnant hone ke chances zyada honge!



Fertility ke baare mein Galatfahmi

Chaliye, ab ham fertility ke baare mein kuch galat soch ke baare mein jaanen!


Galatfahmi #1

Infertility ki vajah sirf female hoti hai

Aisa nahin hai! Pregnancy ke liye do logon ki zaroorat hai…isliye female AUR male donon partners ka fertile hona zaroori hai.


Galatfahmi 2

35 saal se zyada ki females pregnant nahin ho sakti

Ye depend karta hai. Age ke saath fertility kam ho jaati hai, lekin 35 saal se zyada ki females phir bhi pregnant ho sakti hain.

Jinhen menopause ho chuka hai, voh pregnant nahin ho sakti. Menopause ka matlab hai ki periods band ho chuke hain, aur ye aamtaur par 40 ya 50 ki umr mein ho jaata hai.

Jahaan tak males ka savaal hai, voh apni poori zindagi sperm produce karte hain, lekin umr ke saath unki sperm quality kam ho jaati hai. Zyadatar males aur females 30 ke aas paas apni peak fertility haasil karte hain. Jiska matlab hai ki 30 ke baad, fertility kam hoti jaati hai.


Galatfahmi 3

Birth control ki vajah se infertility hoti hai

Aisa nahin hai! Hormonal birth control (jaise pill) baccha paida karne ki aapki ability par asar nahin daalti hai. Lekin, STI ka asar zaroor padta hai. Isliye, birth control aur barrier method (jaise condom) ka istemaal zaroori hai taaki STI aur pregnancy, donon ko roka jaa sake. Jab aap pregnant hone ki koshish karen, to birth control band method istemaal karna band kar den. Birth control pills mein maujood hormones aapki body mein sirf kuch hi time tak rahte hain (isi liye aap inhen roz leti hain). Jab aap inhen lena band kar dengi, to aapki normal cycle shuru ho jaayegi aur aap kuch hi mahinon mein pregnant ho jaayengi.


Galatfahmi 4

Kuch sex positions se conceive karne mein madad milti hai

Aapne suna hoga ki kuch positions conceive karne ke liye acchi rahti hain. Lekin aisa nahin hai! Sabse zaroori cheez hai aisi position ki talaash karna jo aapke aur aapke partner ke liye comfortable ho. Conception tab hota hai jab male sperm aur female eggs milte hain. Agar sex ke dauraan, penis ka sperm vagina ko enter karta hai, to aap pregnant ho sakti hain. To bas, condom ko drawer mein hi rahne den!


Galatfahmi 5

Sex ke baad letne se kya madad milti hai?

Sex ke baad letne se conceive karne ka aapka chance nahin badhega. Lekin haan, sex ke baad apne partner ke saath cuddle karne ke kai faayede hain, jaise…

  • Aapka relationship mazboot hoga

  • Aapko neend acchi aayegi

  • Dard kam hoga

  • Heart disease ka khatra kam hoga

  • Aur aapka stress bhi kam hoga


Galatfahmi 6

Overall health ka fertility par koi asar nahin hota

Aisa nahin hai! Aapki physical aur mental health bahu zaroori hai. Acche lifestyle choices se aapki sehat behtar hogi aur aapki fertility ko boost milega!


Infertility

Infertility kya hoti hai? Maan lijiye aap pregnant hone ki koshish kar rahi hain. Aap regularly bina kisi protection ke sex kar rahi hain, lekin ek saal ke baad bhi aap pregnant nahin ho paati. Ise infertility kaha jaata hai, aur ye males aur females donon mein hoti hai. Conceive karne ke liye donon partners ka fertile hona zaroori hai.

Women mein infertility ka reason:

☑ Irregular periods ya menstrual periods nahin hona

☑ Ek se zyada miscarriage

☑ Endometriosis

☑ Pelvic inflammatory disease ki history

☑ Hormonal disorders

☑ Genetic disorders


Men mein infertility ka reason:

☑ Testicular trauma ki history

☑ Kisi doosre partner ke saath infertility ki history

☑ Sexual dysfunction, jaise ki erection hona ya banaye rakh paana

☑ Hormonal disorders

☑ Genetic disorders


Doctor ki salaah kab leni chahiye

Yahaan kuch aise reasons diye gaye hain, jab aap health worker se salaah le sakti hain:

☑ Aap ek saal se zyada time se bina protection (koi condom ya birth control nahin) sex kar rahi hain

☑ Aapki umr 35 saal se zyada hai

☑ Aapka ek ya zyada baar miscarriage ho chuka hai

☑ Aapke partner ko erection hone ya banaye rakhne mein mushkil hoti hai

☑ Aapko koi period nahin ho raha hai, periods irregular hain, ya heavy bleeding ho rahi hai

☑ Aapko ya aapke partner ko sexually transmitted infection (STI) ho chuka hai

☑ Aapko diabetes ya high blood pressure jaisi long-term medical condition hai.


Pregnant nahin ho paane ke kai reasons ho sakte hain aur inke solutions bhi kai hain! Healthcare facility, doctor ke office ya clinic aapki mushkilon ko duur karne mein madad kar sakta hai.


Yaad rakhiye, agar aapko pregnant hone mein mushkil ho rahi hai, to ye kabhi bhi aapki galti nahin hai. Agar aapko ye symptoms nahin bhi hain, to bhi pregnancy se pahle, dauraan aur uske baad regular check-up karvaana acchi baat hai. Is process mein Nivi aapko support karne ke liye maujood hai.

 

Kya sex, STI, birth control ke baare mein aapke koi savaal hain? Yaad rakhiye, aap kabhi bhi WhatsApp aurFacebook Messenger par Nivi se chat kar sakte hain. Ye private, confidential, aur free hai!

Comments


bottom of page